• Горан Упале
Честитки за големата победа на нашата најдобра ракометна селекција пристигнуваат од сите страни. Бројни клубови и федерации од Македонија го поздравија успехот на ракометарите и пласманот на Светското првенство во 2025 година, а искрена честитка дојде и од Амбасадата на Соединетите Американски Држави во Македонија.
„Честитки до Ракометната репрезентација за големата победа вчера и пласманот на Светското првенство (СП) во 2025!“, стои во објавата на Американската амбасада во Македонија на социјалните мрежи.
На трибините на синоќешниот натпревар во Скопје беше и амбасадорката на Соединетите Американски Држави во Македонија, Анџела Агелер, која победата на Македонија ја следеше во друштво со првиот човек на Ракометната федерација на Македонија (РФМ), Живко Мукаетов.
Македонија приреди неверојатен пресврт во двомечот со Фарски Острови. На гости загубивме со седум гола разлика, но тоа не беше пречка за убедлива победа во Скопје од 34-26 и пласман на нов голем ракометен собир.
