• Мартин Танасковски
Македонскиот пливач Евгениј Поп Ацев оствари уште еден голем подвиг, откако успешно го преплива каналот Ла Манш. Тој до целта стигна за време од девет часа и 43 минути, со што стана само петтиот Македонец кој го постигнал овој импресивен успех.
Ла Манш претставува еден од најголемите предизвици во маратонското пливање, познат по своите силни морски струи, ниски температури и непредвидливи временски услови. Затоа ваквото достигнување претставува исклучителен спортски подвиг и доказ за извонредната подготвеност, упорност и ментална сила на Поп Ацев.
Со овој подвиг, македонскиот пливач се приклучи на елитното друштво на сонародници кои во минатото успеале да го совладаат овој канал, оставајќи трага во спортската историја на Македонија. Претходно, тоа го направија Нико Нестор, Атина Бојаџи, Томи Стефановски и Игор Димовски.
Поп Ацев веќе е познат како еден од најуспешните македонски маратонци на вода, со бројни победи и настапи.