Успешен настап на македонските пинг-понгари на турнирот во Лерин

Вчера и денес во Лерин, соседна Грција, се одржа петтиот меѓународен турнир во пинг-понг. На турнирот на кој учествуваат најдобрите играчи од Грција, имаше играчи и од Полска, Бугарија, Србија и голем број на играчи од Македонија.

Турнирот кој секоја следна година е подобар во однос на квалитетот на играчите исто така секоја година има и поголем награден фонд. Оваа година фондот за награди изнесуваше 3.400 евра. Од Македонските играчи во машка конкуренција најголем успех во апсолутна категорија оствари Кристијан Станојковски кој го освои третото место. Во женска конкуренција Сара Стојановска беше второпласирана, додека Ана Стојановска заврши како третопласирана. Исто така забележителен успех во апсолутна категорија забележаа и Живко Апостолоски, како и ветераните Миле Петрески и Зоран Јовановски.

Во турнирскиот дел каде што играчите се поделени по старосни категории, во категоријата за играчи постари од 60 години, повеќекратниот првак на Македонија, Миле Петрески го освои првото место, додека втор беше Зоран Јованоски. Во категоријата за играчи од 50 до 59 години трето место освои Сашо Љамов. Во категоријата за играчи од 40 до 49 играчи, трето место освои Сашо Стојановски.

Севкупно одличен настап на нашите претставници на турнирот во соседна Грција.