• Зоран Мишевски
Македонскиот репрезентативец Александар Љафтов и неговиот тим, унгарски Елоре го освоија сребрениот медал во Средноевропската МЕВЗА лига, откако во финалето со 3-2 (25-21, 25-20, 21-25, 14-25, 15-11) загубија од хрватскиот претставник Мурса. Во финалето кое траеше 131 минута, Елоре успеја да се врати од 2-0 негатива, но не и да стигне до титулата. Љафтов рализираше шест поени во овој дуел. Интернационалецот и неговиот тим сега се насочуваат кон унгарското првенство каде се на лидерската позиција и еден од главен фаворит за шампионската титула.
Капитенот на машкиот национален тим Никола Ѓоргиев и Карловарско во Чешка регуларниот дел од сезоната го финишираа на првата позиција на табелата, а викендов започнуваат со плеј-оф разигрувањето, каде првите шест екипи во Екстра лигата обезбедуваат директен пласман, а меѓу нив е и Карловарско како лидер. Во последниот дуел од регуларниот дел, Карловарско со 3-0 (25-22, 25-21, 25-22) славеше на гостувањето кај Брно, а Ѓоргиев беше МВП на мечот со 19 поени.
Поранешниот репрезентативен среден блокер, Ристо Николов и неговиот Нефелс откако обезбедија финале во Купот на Швајцарија, сега го потврдија и пласманот во финалето на плејофот во швајцарското првенство. Во полуфиналето тимот на Николов го победи Шеноис со 3-1 (25-23, 25-16, 21-25, 25-22). Средниот блокер го одигра целиот натпревар и реализираше шест поени (четири од напад и два од блок). Искусниот интернационалец во моментов се наоѓа на второто место на листата на најдобри блокери, со 48 успешни блокови сезонава, додека пред него е одбојкарот на Амрисвил, Џоел Хаук со 51 блок. Во куп финалето Нефелс ќе се соочи со Амрисвил, додека во финалето на плејофот го чека победникот од дуелот меѓу Амрисвил и Шоненверт.
Поранешниот македонски репрезентативец и интернационалец Ѓоко Јосифов од оваа сезона успешно „плива“ во тренерските води како стратег на австриски Валдфиртел, со кој ќе игра во полуфиналето на плеј-офот. Јосифов и неговиот тим во четвртфиналето го елиминираа Грац (две победи од по 3-1) и сега за предизвик го имаат тимот на Хартберг, кој претходно сезонава им застана на патот кон Куп финалето.