• Зоран Мишевски
Шестото коло од Втората кошаркарска лига донесе мали промени на водечките позиции. Ја издвојуваме победата на екипата на Соколи 1933 во дербито против Ангели, со 72:68. По шест одиграни кола, штипскиот второлигаш со скор (5-1) е на првата позиција, со ист учинок како и Црн Дрим и Борец баскет.
И без помошта на своите навивачи во „Нико Нестор“, кошаркарите на Црн Дрим лесно се справија со Академија ФМП. Стружани стигнаа до убедлива победа со 90-64, по која остануваат на делба на првата позиција на табелата.
Приклучок со самиот врв држи и екипата на Борец баскет. Во ова коло велешани славеа на гостински терен кај Работнички 2018 во Скопје, со сигурни 65-75. До петтиот триумф во шест кола ги предводеше најискусниот, Штерјов, кој реализираше 22 поени, а одлични соработници во фазата на нападот имаше и во Чадамов, кој реализираше 17 и Митрев кој додаде уште 14 поени.
Во домашната екипа Шошкиќ постигна 23, а Трајковски уште 11 поени.
Втора лига (м)
Шесто коло:
Партизан Водно Санс – Охрид 71-99
Црн Дрим – Академија ФМП 90-64
Бутел – Мега баскет 84-79
Работнички 2018 – Борец баскет 65-75
МЗТ Скопје Уни Банка – Маџари 86-76
Соколи 1933 – Ангели 72-68
