• Горан Упале
Дебитантот во АБА2 лигата, ТФТ Скопје, претрпе уште еден висок пораз во регионалното натпреварување. Во вториот натпревар од „балонот“ во Бања Лука, скопскиот тим загуби со 81-58 oд Широки и направи чекор назад во трката за влез во плеј-офот.
По шокантниот пораз во претходното коло од најслабиот тим во лигата, Шенчур Крањ, се чинеше дека момците на Боро Смилковски ја вратија самодовербата и одиграа одлично прво полувреме против тимот од Босна и Херцеговина, но потоа нивната игра се распадна и доживеаја уште еден дебакл. Иако првиот квартал им припадна на кошаркарите на Широки (18-15), веќе во вторите десет минути ТФТ го прикажа најдоброто од себе и го презеде водството.
Костоски и Андерсон беа вистински лидери и на свој грб го водеа освојувачот на македонскиот Куп до 19-26 во втората четвртина и предност на полувреме од 37-41. Двајцата постигнаа по осум поени, а солиден беше и Бишоп со два поени помалку.
По одличното прво полувреме, следуваше катастрофално второ. Кошаркарите од Тавталиџе на паркет делуваа тотално немоќно, примија дури 44 поени, а постигнаа само 17, па тоа донесе и катастофален пораз од 23 поени разлика (81-58).
Костески со 14 поени и Бишоп и Андерсон со по десет беа најпрецизни за ТФТ, додека за победничкиот тим на Широки, 22 поени постигна Литл.
