• Горан Упале
Светскиот шампион во кошарка не се шегува. Кошаркарската селекција на Германија извојува уште една убедлива победа на олимпискиот турнир и го потврди првото место во групата Б. Во дербито на денот Германците го „треснаа“ домаќинот Франција, совладувајќи го со високи 71-85.
Планетарниот владетел поквалитетно го отвори дуелот во париската сала и диктираше свое темпо на игра, кое кулминираше со неверојатни втори десет минути. По првата четвртина резултатот беше 18-24 за гостите, по што следуваше доминација на Германците. Франција влезе во сериозна криза, постигна само девет поени, а прими дури 24, па прашањето на победникот веќе беше решено. На полувреме се замина со +21 за фаворитот (27-48).
По паузата Франција го подигна нивото на играта, но Германија продолжи со одличниот настап и го зголеми водството на +23. Во последниот квартал бундес-тимот се опушти, а тоа донесе нешто поефикасна игра на домаќинот, но доволно само за пораз од 71-85.
Шродер и Вагнер со по 26 поени диригираа во таборот на победничкиот тим, додека за Франција се истакна Вембањама со 14 поени.
