• Горан Упале
Кошаркарите на Штип не успеаја со победа да ја започнат својата прва сезона во македонската кошаркарска елита, откако на домашен терен убедливо загубија од Тиквеш со 65-93.
Кавадарчани уште во првите десет минути направија огромна разлика и практично најавија дека победата нема да остане во Штип. Тиквеш одигра одлична прва четвртина, во која постигна 30 поени, а прими само шест, па на семафорот стоеше високи 6-30.
Штип во вториот дел успеа да ја намали разликата и ја доби третата четвртина со 24-18, но тоа беше премалку за целосен пресврт. Тиквеш повторно го подигна нивото на игра во завршните десет минути и без проблеми го приведе натпреварот до крај за убедлива победа од 65-93.
Најефикасен кај победничкиот тим беше Смит со 25 поени, на кои додаде и осум асистенции. Кај Штип, Хамилтон, Стенфорд и Александровски постигнаа по 13 поени.
