• Горан Упале
Женската кошаркарска репрезентација на Шпанија извојува уште една тешка победа на олимпискиот турнир, откако со еден поен разлика (62-63) ја совлада селекцијата на Порторико, во рамките од второто коло од групата А. Со овој успех „фуријата“ веќе го обезбеди своето учество во четвртфиналето.
Шпанките, кои се мачеа и во првото коло против Кина и на крај славеа по продолжението, моќно го отворија овој дуел. По првата четвртина се изборија за предност од девет поени (9-18), а уште поефикасни беа во вторите десет минути. Но, и Порторико, по лошата воведна четвртина, се консолидира и заигра поквалитетно. Сепак, ниту тоа не беше доволно за намалување на негативата, туку во спротивно, таа се искачи на високи 14 поени на полувреме (25-39).
По паузата Шпанија, наместо рутински да ја одржува високата предност, влезе во голема криза. Постигна само пет поени за десет минути и дозволи противникот да се врати во игра. Во последниот квартал се влезе со егал резултат (44-44), а Порторико имаше водство во поголемиот дел, но во лудата завршница Шпанките се снајдоа подобро и на крај славеа минимална победа од 62-63.
Најдобра кошаркарка на паркетот беше Густафсон од Шпанија со 18 поени, а кај Порторико најпрецизна беше Гуирантес со 14 поени.
