• Иван Димовски
Кошаркарската репрезентација на Шпанија до 18 години го одбрани европскиот трон, откако во финалето на Европското првенство славеше против домаќинот Турција во Измир со 68-61. „Фуријата“ демонстрира сила во текот на натпреварувањето, па не е чудо што успеа да го повтори успехот од пред три години.
Домаќинот не успеа да го шокира големиот фаворит, иако солидно парираше во ова финале и на крајот мора да се задоволи со бронза. Најдобар на паркетот за Шпанците беше Рафаел Виљар со 20 поени, а му помогна Алманса со 14 поени и 15 скока, со што го потврди своето МВП признание. Во турскиот табор со 12 поени се истакна Озгур Џенгис, додека по десет уфрлија Бујукчангаз и Конан.
Во „малото финале“ бронзениот медал ѝ припадна на Србија, со триумф над Словенија од 67-70. По дебаклот од Шпанија во полуфиналето, српските кошаркари пронајдоа утеха во натпреварот за третото место и успеаја да освојат медал од ова Европско првенство.
До победата против словенечките кошаркари, Србија ја предводеше Ѓорѓе Чурчиќ со 21 поен, додека солиден беше и Лазар Ѓоковиќ со 15 реализации. Во таборот на Словенија се истакнаа Ален Зулиќ со 16 и Јан Земљиќ со 15 поени.
На ова Европско првенство, во А-дивизијата по долго време настапи и Македонија. Избраниците на Тони Симиќ сепак имаа турнир за заборав, победија само еднаш и завршија на 14. позиција, со што експресно се враќаат во Б-дивизијата за следните турнири.
