• Зоран Мишевски
Кошаркарите на Атланта загубија на свој терен од Шарлот со резултат 122-118 во еден од највпчеатливите натпревари од богатата НБА ноќ. Хоукси ја прекинаа серијата од пет победи и со скор 24-23 се осми во Источната конференција, додека Шарлот е на дното со скор од 13-34. Домашните кошаркари имаа максимални 19 поени на почетокот на вториот дел, но им дозволија на Хорнетси да се вратат. Финишот на натпреварот во Џорџија им припадна на гостите, кои го завршија дуелот со серија од 5-0 и со тоа го забележаа вториот последователен триумф.
Тери Розиер ги предводеше гостите со 34 поени (7/13 за три поени), три скока и пет асистенции, Мејсон Пламли додаде 25 поени, со 11 скока, а Пи Џеј Вашингтон 23 поени со по шест скока и асистенции. Во поразениот тим Дежонте Мареј постигна 26 поени (4/6 за три поени), а Деандре Хантер и Треј Јанг запишаа по 25 поени.
Кливленд го совлада Милвоки пред своите навивачи со 114-102 и со учинок 29-19 моментално е петти на Истокот. Бакси имаат два порази помалку. Еван Мобли, третиот пик на драфтот во 2021 година, блескаше со 38 поени (19/27 од поле, 0/2 од три поени), девет скока и три асистенции, Дариус Гарланд запиша 21 поени со 10 асистенции, а Карис Леверт и Џеди Осман по 13 поени. Во поразениот тим го немаше Јанис Адетокумбо, но се истакнаа Џру Холидеј со 28 поени, 4 скока и 10 асистенции и Боби Портис со 23 поени и 11 скока.
Минесота беше подобра од Хјустон со 113-104 со 44 поени на Ентони Едвардс (8/16 за три), додека на другата страна одличен беше Алперин Шенгун со 19 поени, 16 скока и 7 асистенции. Натпреварот го одбележа и спектакуларното забивање на Едвардс над турскиот ас.
