• Саше Љолес
Легендарниот кошаркар на Њујорк Никс, Вилис Рид, почина денес во осумдесеттата година од животот, јавуваат американските медиуми.
Рид беше освојувач на два шампионски прстена, во 1970 и 1973 година, а ќе остане запаметен и како единствен играч во историјата на Никс кој се закитил со признанието за најкорисен играч на лигата (МВП).
Вилис Рид помина десет извонредни години во НБА-лигата и сите сезони настапуваше за тимот од „големото јаболко“, а беше и МВП на Ол-Стар натпреварот во 1970 година.
По пензионирањето, Рид работеше и како тренер и како асистент во тимот. Тој исто така бил избран и за најдобар дебитант или „руки“ на лигата во 1965 година, а примен е и во Куќата на славните во 1986 година.
На ѕидините на „Медисон Сквер Гарден“ одамна е кренат неговиот дрес со бројот 19. Вилис Рид ќе биде запаметен како еден од најголемите играчи во историјата Никс, како и на НБА-лигата.
