Олимпија прави промена, Мозес Рајт ќе има нов тренер во Милано?

Јанис Сферопулос би можел наскоро да се врати на тренерската работа во Евролигата, како предводник на Олимпија Милано. Според италијанските медиуми, грчкиот стратег е меѓу главните кандидати за клупата на италијанскиот гигант, каде што иднината на Џузепе Поета е неизвесна по слабиот почеток на сезоната.

Миланскиот тим не ги исполни очекувањата во воведните натпревари од Евролигата, а поразот од Макаби Тел Авив со 97-79 дополнително го засили притисокот врз стручниот штаб. Раководството на клубот, според пишувањата во Италија, веќе разгледува можни решенија доколку дојде до промена на тренерската позиција.

Сферопулос е добро познато име во европската кошарка. Гркот претходно ги водеше Олимпијакос и Макаби Тел Авив, а последниот ангажман го имаше во Црвена Звезда, од која се раздели во октомври 2025 година. Ако дојде во Милано, ќе му биде тренер и на македонскиот репрезентаивец Мозес Рајт, кој неодамна го облече црвено-жолтиот дрес.

Искуството на Сферопулос во Евролигата го прави интересна опција за Олимпија, која има високи амбиции и сака да се врати во борбата за највисок пласман.

Засега нема официјална потврда дека е постигнат договор со Сферопулос, но доколку се остварат најавите од италијанските медиуми, грчкиот тренер би можел наскоро да добие нов предизвик во елитното европско натпреварување.