• Зоран Мишевски
Оклахома Сити Тандер славеше кај Лос Анџелес Лејкерс со 101-93 во највозбудливиот НБА-натпревар за време на ноќта, Ова беше уште еден триумф на Оклахома против тимот кој е еден од главните конкуренти на Западот за висок пласман и учество во плеј-офот.
Овие два тима си ги одмерија силите и во НБА Купот, а Тандерси пак славеа најмногу поради уште една одлична партија на Шеј Гилџес-Александер. Канаѓанецот натпреварот во „Стејплс Центарот“ го заврши со 36 поени, шест скока и девет асистенции. Џејлен Вилијамс крај своето име запиша 19 поени, додека „дабл-дабл“ учинок имаше и Ајзеа Хартенштајн со 11 поени и 18 скока.
Кај Лејкерси се истакна младиот Далтон Кнехт со 20 поени, Ентони Дејвис оствари нов „дабл-дабл“ учинок со 15 поени и 12 скока, а Леброн Џејмс запиша „скромни“ 12 поени, осум скока и шест асистенции.
Бостон Селтикс победи на гостувањето кај Чикаго Булс со 129-138. Уште една добра партија одигра Џејсон Тејтум, кој натпреварот го заврши со 35 поени и 14 скока со пет асистенции, Пејтон Причард, иако го започна натпреварот од клупата, постигна 29 поени, додека Џејлен Браун и Кристапс Порзингис постигнаа по 21 поен. Кај Чикаго, Никола Вучевиќ беше најефикасен со 32 поени и 11 скока, Зек Левин додаде уште 29, но тоа не беше доволно за победа против актуелниот шампион во НБА лигата. Решавачка беше последната четвртина каде Селтикси постигнаа дури 42 поени, додека претходно најмногу гледавме резултатската клацкалка. На крајот сепак домаќините беа поагилни и попрецизни и со тоа го добија овој натпревар.
