• Мартин Танасковски
Турскиот гигант Фенербахче и официјално го претстави Шејн Ларкин како свое ново засилување. Американецот со турски пасош, кој во изминатите осум сезони настапуваше за Анадолу Ефес, потпиша двегодишен договор со турскиот клуб.
Ларкин е едно од најголемите имиња во европската кошарка во последната деценија. По завршувањето на Универзитетот во Мајами, во 2013 година беше избран како 18. пик на НБА-драфтот од Атланта Хокс, а потоа настапуваше за Далас Маверикс, Њујорк Никс, Бруклин Нетс и Бостон Селтикс.
Првото европско искуство го имаше во Басконија, каде веднаш се наметна како еден од најдобрите плејмејкери во шпанското првенство. Во 2018 година се пресели во Анадолу Ефес, каде што ја изгради својата легендарна репутација.
Во дресот на Ефес освои две титули во Евролигата, три шампионски трофеи во турското првенство, четири Суперкупа на Турција и еден национален Куп.
Покрај клупските успеси, Ларкин доби и бројни индивидуални признанија. Тој беше избран меѓу 25-те најдобри кошаркари во историјата на Евролигата, во сезоната 2020/21 беше дел од втората идеална петорка, а една година подоцна се најде и во најдобрата петорка на натпреварувањето.
Со репрезентацијата на Турција, Ларкин минатото лето го освои сребрениот медал на Европското првенство.
