• Мартин Танасковски
Новата сезона 2024/25 во НБА-лигата ќе започне со натпреварот помеѓу Бостон Селтикс и Њујорк Никс, објавија американските медиуми. Средбата на која шампионите од Бостон ќе ги добијат прстените за титулата освоена на крајот од минатата сезона, ќе се одржи во нивната сала „ТД Гарден“ ноќта меѓу 22 и 23 октомври.
Бостон и Њујорк завршија први и втори во регуларниот дел од минатата сезона, а летово њујорчани успеаја да го засилат својот состав со ѕвездата на Бруклин Нетс, Микел Бриџис и се очекува да им дадат на шампионите сериозен тест.
На денот на првиот натпревар ќе се одигра уште еден натпревар. Тој ќе биде во Лос Анџелес, каде локалните Лејкерс ќе бидат домаќини на Минесота Тимбервулвс.
Целосниот распоред за сезоната 2024/25 се очекува НБА да го објави во наредните денови.
