• Мартин Танасковски
Македонскиот плејмејкер Ненад Димитријевиќ во новата сезона ќе има нов клуб. Ѕвездата на Уникс Казан си замина од екипата, потврди клубот на својата интернет-страница каде му посака среќа во иднина.
По две сезони во редовите на Уникс каде се афирмира како лидер, а донесе и титула во ВТБ-лигата, Димитријевиќ тргнува во нов предизвик. 26-годишниот плејмејкер имаше фантастични бројки, но не ја продолжи соработката со рускиот клуб. Во последната сезона од ВТБ-лигата, Македонецот одигра 50 натпревари во кои имаше статистика од 18,6 поени, 6,9 асистенции, 3,6 скока и 1,2 украдени топки по натпревар, за 30 минути во просек на паркетот. Беше МВП на регуларниот дел од сезоната, девет пати беше во идеалната петорка, а исто и во четвртфиналната и полуфиналната серија.
Како следна станица на Ненад Димитријевиќ се споменува „градот на модата“ каде се очекува да го облече дресот на Олимпија Милано и за првпат во кариерата да биде дел од Евролигата. Скопјанецот кој во минатото во повеќе наврати се поврзуваше и со Партизан, во кариерата играше за шпанските екипи Валенсија и Хувентуд.
