• Зоран Мишевски
Кошаркарите на Денвер загубија пред своите навивачи од Бруклин со 120-122, а Никола Јокиќ одигра уште една одлична партија и покрај промашувањето за победа. Српскиот ас го забележа 103. „трипл-дабл“ во кариерата, односно 25-ти во сезоната. Крај своето име ѕвездата од Сомбор запиша 35 поени (14/22 за два поени, 0/1 за три поени, 7/10 слободни фрлања), 20 скока, 11 асистенции и по две украдени топка и блокади, но и тие не беа доволни за лидерот на Западната конференција да избегне трет последователен пораз. Нагетси се и натаму први со скор 46-22, додека Нетси се петти на Истокот со скор 39-29.
Во натпревар со многу пресврти, домаќините на почетокот на вториот квартал имаа и десет поени предност (71-61), но Бруклин во последниот дел влезе со +11 (87-98). Гостите стигнаа и до максимални 13 поени, но Денвер врати во натпреварот и на 40 секунди пред крајот на семафорот стоеше 120-121. Центарот на Нагетси во претпоследниот напад не беше прецизен за два поени, потоа Микал Бриџис беше половично прецизен од слободни фрлања, па на тимот од Колорадо му преостанаа уште 1,1 секунда по тајм-аутот. Јокиќ ја презеде одговорноста, но неговиот удар за три поени не беше прецизен.
Бриџис беше најефикасен кај победничкиот тим со 25 поени, Ник Клакстон додаде 20 со шест скока и пет асистенции, Доријан Фини-Смит и Спенсер Динвиди впишаа по 15, а Камерон Џонсон 14 поени. Покрај Јокиќ, за Денвер се истакна и Мајкл Портер Јуниор со 23 поени, Џамал Марер стигна 16, а натпреварот предвреме го заврши поради повреда.
Вечерва уште Кливленд беше подобар од Шарлот со 108-114, а најдобри беа Дариус Гарланд со 28 поени и по шест скока и асистенции и Донован Мичел со 23 поени и по три скока и асистенции. Кај Хорнетси се истакна Тери Розиер со 27 поени, четири скока и шест асистенции. Кавси се четврти на Истокот со скор 43-27, а Шарлот е претпоследен во истата конференција со 22-48.
