• Иван Димовски
Кошаркарите на Монако ја освоија шампионската титула во Франција, откако во решавачкиот петти натпревар од финалната серија славеа на гостувањето кај Париз со 92-101. Тимот од Кнежевството до трофејот стигна и покрај бројните проблеми со составот, а дополнителен удар пред „мајсторката“ беа суспензиите на Стразел и Диало.
По израмнетото прво полувреме, Париз во третата четвртина создаде солидна предност и делуваше дека чекори кон титула. Сепак, Монако успеа да се врати во игра, направи пресврт и со одлична последна четвртина го скрши отпорот на домаќинот.
Најефикасен кај победникот беше Блосомгејм со 27 поени, Бегарин постигна 18 и додаде осум скока, додека Окобо мечот го заврши со 12 поени и 15 асистенции.
За Монако ова е трета титула во клупската историја и реванш за поразот од Париз во минатогодишното финале.
