• Иван Димовски
Кошаркарската репрезентација на Македонија претрпе шести пораз за крај на квалификацискиот циклус за Европското првенство. На неутрален терен во Рига нашата селекција загуби од номиналниот домаќин Украина со 74-72.
Пресметката во летонската престолнина беше само формалност, бидејќи немавме реални шанси да го преземеме третото место од Украинките кои во Скопје нè декласираа со 49-98.
Тргнавме со стартна минимална предност, а потоа ривалот врза серија од 15-0 со која се одлепи. Се наметнаа Украинките и поведоа сигурно, одржувајќи се во позитива која гравитираше околу двоцифрената граница. Пред паузата Македонија успеа да намали дел од негативата, а на одмор се замина со 37-30.
Поведе Украина во третата четвртина со 15 поени разлика (50-35), а девојките предводени од Ашаданов добро реагираа. Предноста почна да се топи, стигнаа македонските кошаркарки во последната четвртина и на „минус три“ (63-60), ама ривалот одговори со 6-0. Не се предаде Македонија до самиот крај, играше додека имаше шанси и на влезот на последната минута со тројката на Митрашиновиќ поведе првпат по воведните минути (71-72). Сепак, во пенал завршница Украинките подобро се снајдоа и забележаа нова победа.
Анџелика Митрашиновиќ имаше свое шоу, го заврши мечот со 33 поени, додека кај Украина се истакна Иагупова со 19.
