• Зоран Мишевски
Селекторот на репрезентацијата на Литванија, Казис Максвитис од недела во недела добива само лоши вести, бидејќи остана без играчи на кои сериозно сметаше за Мундобаскетот. Сега отпадна и крилниот кошаркар на Жалгирис, Арнас Буткевичиус, кој изврши операција на скочниот зглоб и мора да мирува шест недели.
„Буткевичиус почувствува болка во ногата за време на финалето на литванскиот плеј-оф. Последниот натпревар од серијата можеше да го одигра само со помош на лекови против болки. При операцијата е отстранета калцификацијата кај Ахиловата тетива“, пишува во соопштението на клубот од Каунас.
Максвитис не може да смета на Марус Григонис, Лукас Лекавичиус, Едгарас Улановас и Рокас Ѓедраитис, а голем знак прашалник е и настапот на Домантас Сабонис.
„Сите се надеваме дека Домантас ќе игра, но свесни сме дека шансите се значително помали од 50%. Се додека има шанса, ќе продолжиме да веруваме дека може да ни се придружи“, изјави неодамна Максвитис.
Литванија е носител во групата Д на Мундобаскетот во која се и Црна Гора, Египет и Мексико.
