• Горан Упале
Лос Анџелес Лејкерс, на крилата на незапирливиот Ентони Дејвис, го совлада Феникс Санс со 123-116, во еден од највозбудливите натпревари во ноќта во НБА лигата. Така, Лејкерси ја започнаа сезоната со две нималку наивни победи, против Минесота и Феникс, најмногу благодарение токму на Дејвис.
Искусниот центар ги „закопа“ Тимбервулфси со 36 поени и 16 скока, а сега забележа 35 поени и осум скока, со четири асистенции на двата натпревари. Лејкерси со одлична игра ги надиграа Санси во вториот дел, а во еден момент во вториот дел успеаја да надополнат дури 22 поени негатива.
Покрај Дејвис, кај победниците се истакнаа Остин Ривс со 26 поени и осум асистенции, Леброн Џејмс со 21 поен и осум асистенции и Руи Хачимура со 14 поени и седум скока. На другата страна Кевин Дурент имаше 30 поени и шест асистенции, Девин Букер додаде 23, а Бредли Бил 15 поени, но и двајцата шутираа лошо од поле.
И Голден Стејт Вориорс е на „две од две“, откако по Портланд ја победи и Јута Џез со 127-86. Вориорси беа фуриозни во секоја четвртина. Јута беше уфрлена во машината од првата минута и не доби шанса да ги покаже своите квалитети против разиграниот противник.
Феноменален и шутерски расположен уште еднаш беше Бади Хилд, кој постигна 27 поени, а имаше и четири скока и шест асистенции. Стеф Кари запиша 20 поени, а се истакнаа Брендин Подземски со 15 и Трејс Џексон-Дејвис со 12 поени и 9 скока.
На другата страна Џон Колинс постигна 14, Лаури Марканен 13, а Кијонте Џорџ и Колин Секстон постигнаа по 12 поени.
Њу Орлеанс Пеликанс, кој настапи без Дежонте Мареј, кој ја скрши раката на првиот натпревар, ја забележа втората победа во новата сезона. Пеликанс на гости го совладаа Портланд Трејл Блејзерс со резултат 105-103.
Кај победничката екипа најефикасен беше Џордан Хокинс со 24 поени, Инграм имаше 21, а Зион Вилијамсон бркаше „трипл-дабл“ со 16 поени, 11 скока и 7 асистенции. Кај поразениот тим прв поентер беше Џериан Грант со 34 поени.
