• Горан Упале
Женската кошаркарска селекција на Македонија забележа уште еден убедлив пораз во првата фаза од квалификациите за следниот Евробаскет. На гостувањето кај Грција македонските кошаркарки загубија со убедливи 101-47 и го впишаа четвртиот пораз во групата А.
Нашите кошаркарки катастрофално го започнаа натпреварот во Солун. Во нападот беа безидејни, додека во обраната спори и не толку агресивни. Грција искусно го искористи тоа и немилосрдно го полнеше нашиот кош. Во првите десет минути Македонија прими дури 29 поени, а постигна само скромни седум. Авторки на поените за нашата селекција беа Селцова (3), а по два реализираа Николов и Трајковска.
Во втората четвртина се играше поизрамнето. Македонија конечно се ослободи од притисокот и водена од Александра Стојановска (седум поени) му парираше на фаворизираниот домаќин. Но, тоа не беше доволно за намалување на негативата и Грција на полувреме замина со предност од 49-22.
Македонските кошаркарки потфрлија и во третата четвртина, реализираа само пет поени и дозволија домашната селекција да замине на огромни 50 поени разлика (77-27). Ситуацијата не беше поразлична ниту во последните десет минути – Грција продолжи во ист ритам и заслужено триумфираше со високи 54 поени разлика.
Најпрецизна кај нашата селекција беше Хампе со 21 поен, а Стојановска имаше седум. За Грција по 18 имаа Фасоула и Кримили.
