• Иван Димовски
Кошаркарите на Пелистер испишаа клупска историја, бидејќи обезбедија место меѓу осумте најдобри екипи во АБА-2 лигата и ќе се борат за место во елитата. Битолчани ја издржаа драмата со Слога (93-96) и дојдоа до толку посакуваната победа која обезбеди место во четвртфиналето.
По натпреварот, предводникот на „зелено-белите“ Марјан Илиевски беше задоволен од прикажаното.
„Честитки за моите играчи. Овие момци го заслужија овој успех, иако на почетокот на сезоната со сите промени во клубот, управата размислуваше дека ова е голем залак за нас. Го преполовивме буџетот и прашање беше како ќе издржиме во македонското првенство, а АБА-2 ќе ни биде само екскурзија.
Благодарност до момците кои јас лично ги селектирав, покажаа дека имаат квалитет. Среќни сме што ќе го играме завршниот „балон“ и што ќе го презентираме клубот, градот и македонската кошарка. Да се радуваме на ова што се случи и се гледаме во Словенија“, изјави Илиевски по победата.
Пелистерци ја исполнија примарната цел оваа сезона, дојдоа чекор подалеку од минатата и ќе настапат во доигрувањето на АБА-2 лигата. Иако конкуренцијата е силна, нема сомнеж дека момците на Илиевски ќе дадат максимум на „фајнал-еjт“ турнирот во Домжале, Словенија.
