• Иван Димовски
Кошаркарите на Минесота Тимбервулвс израмнија во серијата против Голден Стејт Вориорс во НБА лигата, откако славеа со 117-93 на вториот домашен натпревар. Немаа „воините“ сили без првата ѕвезда Стеф Кари за нов „брејк“ во Минеаполис и претрпеа неуспех, а сега серијата се сели во Сан Франциско.
- Минесота Тимбервулвс - Голден Стејт Вориорс:
Уште од стартот на средбата во „Таргет Центарот“ се наметна домаќинот бидејќи поведе со 13-0. Имаше Минесота во првиот дел највисоко водство од 22 поени, а на пауза меѓу полувремињата се замина со резултат 56-39. Во продолжението Голден Стејт се обиде да се врати, стигна еднаш на „минус седум“ ама немаше сили за сензација.
Тимбервулвси до крајот одиграа рутински и дури во последните минути стекнаа највисоко водство од 25 поени.
Прво име во победата на Минесота беше Џулиус Рендал со 24 поени и 11 асистенции, додека по 20 уфрлија Едвардс и Александер-Вокер. Кај Вориорси најзапазен настап имаше Куминга со 18, а еден поен помалку уфрли Батлер.
