• Мартин Танасковски
Финскиот кошаркарски талент Мика Муринен, еден од најперспективните европски млади играчи, потврди дека по завршувањето на сезоната ќе стави крај на својата етапа во белградски Партизан и ќе ја продолжи кариерата во колеџ лигата на САД, престижното НЦАА првенство.
Одлуката доаѓа во период кога интересот околу неговото име значително порасна по неговите настапи на Евробаскетот со репрезентацијата на Финска. Муринен привлече внимание од бројни американски скаути, а неколку универзитети веќе ја покажале својата подготвеност да го ангажираат.
Сепак, наместо рано да замине во колеџ системот, тој направи поинаков избор и ја започна професионалната кариера во Партизан, чекор што многумина го окарактеризираа како нетипичен, но храбар и зрел за неговите години. Муринен е задоволен од своето досегашно искуство во Евролигата, каде што во Партизан добива минути против најискусните играчи на континентот. Според него, преминот од младински нивоа кон најсилното европско натпреварување претставувал голем, но важен предизвик.
Одлуката да премине во НЦАА се смета за стратешка, бидејќи американскиот колеџ систем може да му обезбеди дополнителен развој, видливост, структуриран тренинг и шанса да се подготви за потенцијален чекор кон НБА. Според извори во американските медиуми, интересот за Муринен е исклучително висок и тој би можел да стане една од најследените европски млади ѕвезди во колеџ кошарката.
