• Саше Љолес
Евролигата се подготвува за сериозна трансформација на начинот на кој ќе се игра натпреварувањето. Сезоната 2026/27 би требало да биде последна во актуелниот формат со 20 клубови, по што се планира проширување на лигата и воведување поинаков систем на натпревари. Ова го откри генералниот менаџер на Олимпија Милано, Христос Ставрупулос.
Според него, сегашниот модел во кој сите тимови играат меѓусебно ќе остане во употреба уште една сезона. Потоа, Евролигата треба да премине во нова фаза.
„Одлучивме со 20 екипи и овој систем да продолжиме уште една година. Но, ова дефинитивно ќе биде последната сезона во ваков формат“, изјави Ставрупулос.
Најголемата промена би дошла од сезоната 2027/28, кога бројот на учесници треба да биде зголемен. Истовремено, наместо досегашниот лигашки модел, се разгледува поделба на клубовите во конференции.
Тоа би значело дека екипите повеќе нема да имаат задолжителни два натпревари против секој противник. Распоредот би се креирал според новата структура на конференциите.
„Некои тимови повеќе нема да играат двапати против сите противници. Но, секоја промена носи нешто што добивате и нешто што го губите“, објасни функционерот на италијанскиот клуб.
Идејата за конференциски систем не е целосно нова. За ваков модел веќе се разговараше во минатото, но засега нема официјално потврдена конечна структура за тоа како би изгледала Евролигата по проширувањето.
Она што во моментов е извесно е дека по сезоната 2026/27 европската елита би можела да добие повеќе учесници и сосема поинаков натпреварувачки формат.
При креирањето на новиот систем, според Ставрупулос, еден од главните приоритети ќе остане одржувањето на високиот квалитет и конкурентноста на Евролигата.
