• Иван Димовски
Македонија со стил ја отвори втората рунда од претквалификациите за Евробаскет 2029. Нашата најдобра машка селекција на гостински терен во Виена ја совлада Австрија со убедливи 59-91, во натпревар во кој од самиот почеток ја презеде контролата и не му дозволи на противникот да се врати во игра.
Еден од најзаслужните за убедливиот триумф беше Виктор Ефремовски. Mакедонскиот репрезентативец одигра одличен натпревар и беше најефикасен македонски кошаркар на средбата. Според Ефремовски, сепак, клучот за убедливата победа беше тимската игра и одличната одбрана, а дополнителен мотив за репрезентацијата беше тоа што конечно настапи во речиси полн состав.
„Мислам дека одигравме добар натпревар против Австрија. Најважно беше што одигравме добра одбрана и мислам дека токму тоа беше клучот за натпреварот. Како екипа бевме борбени, си помагавме еден на друг и не им дозволивме лесно да доаѓаат до поени. Конечно бевме речиси во полн состав и тоа многу ни значи. Кога сме сите заедно, многу полесно се игра, а особено кога е Нено со нас. Со него многу полесно функционираме и на теренот имаме повеќе опции.
Нè очекуваат важни натпревари во февруари против Кипар и повторно против Австрија. Целта ни е јасна сакаме да завршиме како први во групата и да обезбедиме пласман во квалификациите за Европското првенство. Верувам во оваа екипа и мислам дека имаме квалитет да го направиме тоа. Сега најважно е да продолжиме да работиме, да бидеме здрави и што почесто да бидеме во полн состав. Ако ја задржиме оваа енергија и пристап, верувам дека можеме да ги оствариме целите“, порача Ефремовски.
Македонија во февруарскиот прозорец ќе се соочи со Кипар и повторно со Австрија, а целта е освојување на првото место во групата и пласман во квалификациите за Европското првенство.
