• Мартин Танасковски
Кошаркарот на шпанска Валенсија, Жан Монтеро, е избран за МВП на плејофот во Евролигата, откако го предводеше својот тим до историски пласман на првиот Фајнал-фор турнир во клупската историја.
22-годишниот бек блескаше во серијата против Панатинаикос, во која шпанскиот тим успеа да направи неверојатен пресврт од 0-2 до 3-2 и да се пласира меѓу четирите најдобри екипи во Европа.
Монтеро доминираше во речиси сите статистички категории. Имаше највисок просечен индекс на корисност во плејофот (26.8), беше втор стрелец со 18.6 поени по натпревар, делеше второ место по украдени топки со 1.4 по меч и беше трет асистент со 5.8 асистенции. Импресивни беа и неговите проценти на шут, 73.1% за два поени, 42.3% за три и 81.5% од линијата за слободни фрлања.
Дополнително, Монтеро учествуваше со дури 21.5% од вкупниот број поени на Валенсија во серијата, но неговото влијание не се сведуваше само на поентерскиот учинок, што го покажуваат и речиси шесте асистенции по натпревар.
Ова признание е круна на извонредната сезона за доминиканскиот кошаркар, кој претходно ја освои наградата за „Ѕвезда во подем“, а беше избран и во идеалната петорка на Евролигата.
