Црвена Звезда немоќна во Мадрид, Баерн во финишот подобар од ПАО

Екипата на Црвена Звезда ја заврши шпанската турнеја во Евролигата со пораз. По неуспехот со Басконија, тимот на Дејан Радоњиќ загуби и од Реал Мадрид (79-67) и се враќа на предизвиците во АБА-лигата.

Српскиот шампион гостуваше во престолнината со еден куп проблеми, без неколку повредени првотимци, па ротацијата беше далеку намалена и тоа се покажа како главен проблем за Радоњиќ. Сепак, Црвена Звезда не се посрамоти затоа што парираше три периода, но потоа испушти здив.

  • Реал Мадрид - Црвена Звезда 79-67:

Холинс беше лидер кај белграѓани со 16 поени, пред Цирбес со 12 поени, додека во Реал Мадрид кој е прв во евролигашкото друштво најмногу се истакна Таварес со 15 поени, пред Порие со 14 поени.

  • Баерн Минхен - Панатинаикос 81-78:

Баерн Минхен во самиот финиш успеа да го совлада Панатинаикос (81-78). Одлучи „пенал-завршницата“ која беше во корист на бундеслигашот. Хилиард беше најдобар кај победникот со 20 поени, пред Томас со 17, додека кај „делетинките“ Папапетру финишира со 17 поени.