• Саше Љолес
Кошаркарската федерација на Македонија со писмено соопштение ги информира сите прволигаши дека ќе спроведе вонредна инспекција во сите сали каде ќе се играат натпреварите, за да обезбеди целосна слика за почитувањето на утврдените пропозиции.
Овој потег на челните лица доаѓа по барањето на КК Пелистер за подобри услови и греење во салите, како и подобро делегирање на судиите, а ќе бидат одржани и состаноци кои ќе имаат цел да се спречат сите евентуални манипулации со условите за игра.
Соопштението ви го пренесуваме во целост:
„Кошаркарската Федерација ќе спроведе вонредна инспекција во салите кои се пријавени пред почетокот на сезоната по одигрување на првото коло во новата календарска 2025 година (закажано за претстојниот викенд) за уште еднаш да ги потврди условите согласно пропозициите за натпреварување за тековната сезона.
Сите недостатоци кои ќе бидат забележани од страна на делегатите на натпреварите ќе бидат земени предвид. Ќе бидат одржани и низа на состаноци со претставниците на сите сениорски лиги за да се спречат понатамошни манипулации со условите за игра.
Клубовите кои се натпреваруваат во овој степен на натпреварување добија финансиска поддршка од Министерството за спорт со исплаќање на државните субвенции како и со дополнителната распределба на средства од игрите на среќа, финансиски средства кои федерацијата не ги доби.
Дополнително, истите се и ослободени од котизација за учество во лигата благодарение на спонзорот на лигата што раководството го обезбеди пред почетокот на натпреварувачката сезона. Клубовите се доволно финансиски ситуирани за да ги исполнат сите услови за нормално функционирање на една професионална кошаркарска лига во рамки на највисокиот степен на натпреварување поради што сметаме дека повеќе не постои простор за толерирање на неисполнетост на техничките услови за одржување на еден натпревар.
Воедно, клубовите кои не ги исполнија или делумно ги исполнија финансиските обврски кон КФСМ добија рок за комплетирање на долговите. Во спротивно истите нема да бидат делегирани.
Раководството на федерацијата во најбрз можен рок повторно ќе организира конференција за претставниците на медиумите на која како и минатиот пат транспарентно ќе биде информирана јавноста за работата на федерацијата како и за сите останати информации за тековниот период за кои федерацијата смета дека јавноста треба да е запознаена.
Ја поздравуваме иницијативата на КК Пелистер која апсолутно се сложува со ставовите на федерацијата за обезбедување на еднакви услови од страна на сите инволвирани страни“, стои во соопштението.
Вториот дел од сезоната во Првата кошаркарска лига ќе започне на 12 јануари. Лидер на табелата е МЗТ Скопје со 21 бод, а ист учинок, но со полош кош-количник имаат Пелистер и ТФТ Скопје.
