• Саше Љолес
Кошаркарот на Барселона, Џабари Паркер, се надоврза на изјавите на Турчинот Ергин Атаман и го поддржа во наводите дека НБА шампионот не смее никако да се смета за светски првак во кошарка.
На ова тема се зборуваше многу во минатото, па додека Американците се убедени дека нивниот шампион е убедливо најсилен тим на планетата, има и такви кои воопшто не се согласуваат со тоа.
„Мислам дека многу легенди на овој спорт, па дури и тренерот Атаман се во право. За да бидете светски шампион, мора да се натпреварувате со екипи од целата планета, исто како на Олимписките игри или на Светското првенство. Американците секогаш имаат неверојатно силен состав, но тоа е репрезентација, а тука зборуваме за клупско ниво.
Атаман зборуваше за меч помеѓу Панатинаикос и Бостон Селтикс. Тоа би било навистина интересно. НБА шампионот сигурно ќе биде фаворит, но дури и да има ревијален карактер, овој дуел ќе биде спектакуларен“, изјави Паркер.
Интересно е тоа што Паркер го носеше токму дресот на Бостон Селтикс, каде настапуваше две сезони, а од 2023 година е дел од шпанскиот гигант, Барселона.
