• Зоран Мишевски
Судискиот критериум не беше главна тема на ова Европско првенство, но на два натпревари на домашната репрезентација се крена голема „прашина“. Случувањата на осминафиналето Германија – Данска и посебно на четвртфиналето Германија – Шпанија и натаму се коментираат.
Со самиот податок што Ентони Тејлор се врати дома, а нема конкретно оправдување за две негови одлуки на четвртфиналето во Штутгарт, тогаш извесно е дека УЕФА признава доза на вина и на погрешни одлуки. Недостатокот на дисциплински мерки за Тони Крос на почетокот од натпреварот Германија – Шпанија и непокажаниот пенал за Германија заради играта со рака на Кукуреља се одлуки кои одат на душа на Англичанецот. Секој изговор дека прекршоците на Крос се на почетокот на натпреварот и дека на играта со рака на Кукуреља му претходел офсајд или игра со рака на Фулкруг се алиби и обид да се заштити судијата.
Кој ќе го суди неделното финале во Берлин? Ниту во судиската организација не го знаат одговорот и веројатно имаат само една сигурна опција – Даниеле Орсато. Резервната е Клемен Турпан од Франција, но само ако Французите не играат во натпреварот за титула. Опција е и Марчињак, кој го судеше мундијалското финале во Катар.
Досега арбитражата на шампионатот беше нешто подобра од квалитетот на фудбалот. Треба детално да се анализира критериумот и интерпретацијата на играта со рака, која останува најголема дилема на денешните судии.