• Мартин Танасковски
Легендарниот руски хокеар Александар Овечкин ќе продолжи да го носи дресот на Вашингтон Кепиталс и во сезоната 2026/2027. Клубот официјално потврди дека 40-годишниот напаѓач потпишал нов едногодишен договор, со што ќе ја продолжи својата блескава кариера во НХЛ.
Според договорените услови, Овечкин ќе заработува основна плата од еден милион долари, бонус од 3,25 милиони долари за потпишување на договорот, како и дополнителен бонус од 4,75 милиони долари доколку одигра најмалку 10 натпревари во новата сезона.
Русинот е вистинска икона на Вашингтон Кепиталс. Клубот го избра како прв пик на НХЛ драфтот во 2004 година, а дебитираше една година подоцна. Оттогаш, без прекин, настапува за тимот од главниот град на САД и прерасна во една од најголемите легенди во историјата на франшизата.
Овечкин моментно е најдобриот стрелец во историјата на регуларниот дел од сезоните во НХЛ, со импресивни 929 постигнати голови. Ако се пресметаат и натпреварите од плејофот, тој има вкупно 1.006 голови, со што се наоѓа на второто место на вечната листа, веднаш зад легендарниот Вејн Грецки, кој има 1.016 погодоци.