Скендеровски: Разнишана ни е самодовербата, но не бегаме од фаворитската улога

Васко Скендеровски на изборот за Спортист на Македонија

Можеби нашите футсалци беа разочарани по лошиот претходен циклус за Мундијалот, но веќе следува нова шанса за поправен испит. Следната недела во Скопје почнуваат претквалификациите, а со тоа и нова ера во нашиот футсал. Имено, Васко Скендеровски се врати на селекторското место и на натпреварите против Норвешка и Велс ќе биде хендикепиран и ќе настапи без Адријан Мицевски, Драган Петровиќ и Мартин Тодоровски, тројцата отсутни заради повреда.

„После лошо одиграниот квалификациски турнир за пласман на Светско првенство, како повратник во репрезентацијата пред мене е голем предизвик, пред се да го вратиме победничкиот дух и атмосферата која во изминатите години ја красеше оваа селекција. Не смееме да бегаме од улогата на фаворити, иако сериозно е разнишана самодовербата кај играчите, но за мене тоа е дополнителен мотив да ја прифатам одговорноста и повторно да застанам на чело на репрезентацијата. Ни следат два интересни и возбудливи натпревари, но имајќи го во предвид квалитетот на селекциите, се чини дека битката за директен пласман во главната рунда ќе биде помеѓу нашата и норвешката селекција.

Иако на турнирот поради повреда ги немаме Адријан Мицевски, Драган Петровиќ и Мартин Тодоровски, сепак сметам дека сме доволно квалитетни да ја оправдаме фаворитската улога. Имаме повратници во тимот, но и тројца дебитанти, Јованов Јосиф, Лазар Пеев и Бериша Шефкет кои се надевам дека ќе ја оправдаат довербата и ќе дадат свои придонес“, изјави Васко Скендеровски.

Македонија ќе се сретне на 30 јануари со Велс и на први февруари со Норвешка. Со оглед на правилникот, право на грешка нема, бидејќи само една од овие три селекции ќе се квалификува во главниот циклуѕ од квалификациите.