• Мартин Танасковски
Колумбискиот фудбалер Хамес Родригез, човекот кој блесна на Светското првенство во Бразил во 2014 година и ги освои симпатиите на целиот свет со својата техничка елеганција и фудбалска интелигенција, повторно се наоѓа во потрага по нов клуб. Според најновите информации од светските спортски медиуми, поранешниот играч на Реал Мадрид го напуштил мексикански Леон и е слободен играч.
Хамес се прослави пред една деценија како прв стрелец на Светското првенство во 2014 година, каде што Колумбија дојде до четвртфиналето, а неговите спектакуларни голови, особено оној против Уругвај, останаа запаметени во историјата на Мундијалите. Тогашниот 23-годишен офанзивен играч обезбеди трансфер во Реал Мадрид вреден 75 милиони евра, но престојот во шпанскиот гигант не донесе очекувани резултати. И покрај големиот потенцијал, Родригез не успеа да се наметне во конкуренцијата и постепено падна во сенка.
Следуваа позајмици и трансфери во Баерн Минхен, Евертон, Ал-Рајан, Олимпијакос, Сао Паоло, а последно во мексикански Леон. Секоја од тие етапи започнуваше со надеж за нов почеток, но завршуваше со разочарување и раскин на договорот пред истекот на сезоната. Според новинарот Фабрицио Романо, овојпат колумбискиот капитен сам побарал да го напушти мексиканскиот клуб, загрижен дека натпреварувањето во Лигата МХ нема да му овозможи оптимална физичка подготвеност пред Светското првенство кое ќе се одржи следната година.
Родригез, кој денес има 33 години, останува еден од симболите на колумбискиот фудбал и капитен на националниот тим со 120 настапи и 30 постигнати голови. Меѓутоа, дилемата останува – дали некогашното „златно момче“ на светскиот фудбал ќе успее повторно да најде клуб што ќе му ја врати формата и самодовербата, или ова ќе биде последното поглавје во една кариера што започна со блесок, а завршува со неизвесност.
