• Мартин Танасковски
Македонскиот репрезентативец Илија Несторовски е топ-тема во Италија. Поради добрата игра во редовите на Палермо и голгетерската серија тој е мета на неколку клубови, меѓутоа, првиот човек на тимот од Сицилија, Маурисио Зампарини не размислува да го продаде.
Популарниот Нестогол игра во фантастична форма и зад себе има седум гола во Серија А, што го носи меѓу најдобрите стрелци. Во изминатиот период Несторовски се поврзуваше со трансфер во Наполи, излегоа информации дури и дека двата клуба преговарале, меѓутоа, Зампарини ги отфрли таквите шпекулации.
„Несторовски не оди никаде во јануари. Никогаш не преговарав со Де Лаурентис, па затоа, нема што да разговарам на оваа тема“, луто изјавил претседателот на Палермо за италијанските медиуми.
Несторовски во италијанската елита постигна погодоци против Кротоне, Аталанта, Сампдорија, Удинезе, Каљари, Милан и Болоња, но неговиот Палермо не успеа да и се радува на победата на повеќе од еден натпревар (против Аталанта). Нареден предизвик за Нестогол е дуелот против Лацио кој се игра наредниот викенд.
