• Зоран Мишевски
Време е за вечното дерби. Да се играше натпреварот меѓу Црвена звезда и Партизан пред две недели, најдобриот тим во српската Суперлига ќе беше апсолутен фаворит. И сега коефициентот за победа на домаќинот е многу низок, но расположението значително се промени – од „Маракана“ позитивната енергија се пресели во Хумска.
Црвена звезда доживеа тежок пораз во Чешка, додека Партизан остави силен впечаток во двомечот со Хетафе, а потоа дополнително ја зацврсти самодовербата со триумфот над ОФК Белград. Токму во ранливоста на тимот на Алберт Риера и во фактот што „црвено-белите“ сè уште се навикнуваат на новиот систем на игра, екипата на Саша Илиќ гледа реална шанса да ја прекине лошата традиција на „Маракана“.
Партизан нема победа на теренот на својот најголем ривал уште од април 2017 година. Ретко „црно-белите“ успеваа да извлечат позитивен резултат на најголемиот српски стадион. Последните две дербија завршија со идентичен резултат – Црвена звезда победи со 3:0. Дополнително, „црвено-белите“ имаат пет победи на последните седум меѓусебни средби. Или уште поилустративно – Партизан славеше само еднаш на последните 17 натпревари против Црвена звезда во сите натпреварувања.
Многу работи се на страната на Црвена звезда, која и покрај разочарувањата во Европа останува недопирлива во домашното првенство. Има пет последователни победи. Од друга страна, Партизан запиша три порази на последните четири првенствени натпревари и во еден момент се наоѓаше во зоната за испаѓање. Сепак, сето тоа губи значење кога ќе започне вечното дерби.
Може да се заклучи дека ова дерби има потенцијал да донесе голови. На последните четири натпревари на Партизан во сите натпреварувања беше ГГ. Покрај тоа, „црно-белите“ се засилија во нападот со играчи како Никола Чумиќ и Игор Миладиновиќ. Црвена звезда се наоѓа во процес на транзиција, сè уште не е целосно воиграна, а останува да се види дали шанса ќе добијат доцните летни засилувања како Михаило Ристиќ, Бразилецот Накајама и Бамба Дијанг. Во овој момент тешко е прецизно да се процени колку навистина може Црвена звезда, а колку Партизан.
Дополнителен проблем за Саша Илиќ е тоа што во неделата на дербито остана без првиот десен бек Милан Рогановиќ, што ќе му создаде главоболки при составувањето на стартниот тим. Натпреварот ќе биде интересен и поради уште еден детал – двајцата тренери ќе дебитираат во вечните дербија. Саша Илиќ е една од најголемите легенди на Партизан и сигурно ќе знае како да им ја пренесе тежината и атмосферата на овој натпревар на своите фудбалери. Последниот странски тренер кој ја водеше Црвена звезда во најголемиот натпревар на српскиот фудбал беше Барак Бахар – и загуби. Затоа, претпазливост е неопходна.
Ако нешто изгледа најреално пред почетокот, тоа се головите. Двете екипи имаат причини да играат офанзивно, а околностите ветуваат дерби со многу возбудувања.
