• Мартин Танасковски
Европскиот шампионат за фудбалери до 21 година започна со спектакл. Во воведниот натпревар од групата А, домаќинот Словачка во Братислава загуби од Шпанија со резултат 2-3, во меч исполнет со пресврти и емоции.
Шпанците тргнаа фуриозно и веќе по само 18 минути водеа со 0-2 благодарение на головите на Пубиљ во 16. и Џозеф во 18. минута, што им ја обезбеди контролата врз натпреварот во првото полувреме.
Но, во вториот дел Словачка заигра далеку подобро. Копасек во 48. минута намали на 1-2, а само пет минути подоцна Суслов израмни од пенал и донесе еуфорија меѓу домашната публика.
Кога се чинеше дека дуелот ќе заврши без победник, Тарега во 90. минута донесе три бода за Шпанија и остави Словачка со горчлив пораз. Подоцна вечерва, во рамки на истата група, ќе се одигра уште еден интересен дуел меѓу Италија и Романија, со почеток во 21:00 часот.
ФОТО: Selección Española Masculina de Fútbol / Twitter
