• Мартин Танасковски
Романскиот прволигаш УТА Арад официјално го продолжи договорот со македонскиот фудбалер Дин Аломеровиќ до 2028 година. Левиот бек пристигна во Арад минатото лето и веднаш се наметна како еден од најважните играчи во тимот.
Во својата прва сезона во Суперлигата на Романија, Аломеровиќ одигра 35 натпревари во првенството и Купот, постигна три гола и забележа четири асистенции. Од клубот истакнаа дека Македонецот со своите игри, односот на теренот и врската со навивачите заслужил важно место во колективот.
„Се чувствувам одлично и многу сум среќен што ќе ја продолжам кариерата тука, во УТА. Арад е посебен! Ако треба да ја опишам УТА со три збора, тоа би биле: емоција, големо срце и победнички дух“, изјави Дин Аломеровиќ по потпишувањето на новиот договор.
Од УТА Арад порачаа дека се среќни што заедничката приказна продолжува и му посакаа многу успеси на македонскиот дефанзивец кој во друштво на својот менаџер Денис Омерагиќ го потпиша новиот договор за соработка.
