• Горан Упале
Баерн Минхен одново ги разочара своите фанови и ја искомплицира борбата за шампионската титула во Бундеслигата откако загуби од Лајпциг со 1-3.
Баварците имаа водство по првите 45 минути, но во вториот дел застанаа и примија три гола. Тренерот Томас Тухел го коментираше натпреварот и очекувано беше незадоволен.
„На почетокот одигравме добро, што беше доволно за заслужено водство, дури требаше да биде и 2-0. Но, застанавме, не бевме таму во вториот дел. Не знам како да објаснам. Тешко е да се победи ако постојано играте под вашето ниво, кое постојано паѓа. Гледам како тренира тимот, тие имаат енергија и интензитет. Не знам како може да се случи вакво нешто.
Загубивме поради нашето однесување. Поразот е наша одговорност и тоа го прави уште потешко. Кога веќе губам сакам да загубам од подобар тим, кој ќе игра подобро од нас“, изјави Тухел.
Баерн сега си ја загрози лидерската позиција во Бундеслигата, затоа што со евентуална победа над Аугсбург вечерва, Борусија Дортмунд ќе го преземе првото место.
