• Горан Упале
Со триумфот во финалето на Светското првенство за клубови, Челзи ги освои сите можни трофеи откако клубот го презеде рускиот олигарх Роман Абрамович.
Во финалето во Абу Даби „сините“ со 2-1 по продолженијата го совлада тимот на Палмеирас и го израдуваа својот сопственик со пехарот кој единствено му недостигаше. Менаџерот на Челзи, Томас Тухел за англиските медиуми изјави дека пехарот му го посветил токму на својот газда.
„Секако дека трофејот е за него. Се видовме на теренот по финалето, тој ми честита, а јас возвратив - „Ова е за тебе, клубот е ваш и вашата страст за фудбалот и вашиот придонес го овозможи ова“. Среќен сум што сум дел од сето ова“, изјави германскиот стручњак.
Откако Роман Абрамович стана сопственик на клубот во летото 2003 година, Челзи прерасна во еден од најдобрите клубови во светот. Двапати ја освои Лигата на шампионите (2012, 2021), пет пати Премиер лигата (2005, 2006, 2010, 2015, 2017), исто толку пати ФА Купот (2007, 2009, 2010, 2012, 2018), Лига куп го освојуваше трипати. 2005, 2007, 2015), двапати славеше во Комјунити Шилд (2005, 2009), двапати Лига Европа/Куп на УЕФА (2013, 2019), еднаш УЕФА Суперкуп (2021) и сега конечно титулата од Светското клупско првенство.
