• Мартин Танасковски
Црвена Звезда на подготовките пред новата сезона под водство на Дејан Станковиќ го има Матеј Гаштаров кој постигна гол на првиот тест во Златибор, но и уште еден голем талент од македонската фудбалска генерација. Тоа е Лука Трпевски, за кого српските медиуми имаат пофални зборови.
16-годишниот Трпевски се смета за еден од најголемите македонски таленти, настапува во средниот ред и е дел од пионерската екипа на „црвено-белите“. Тој воедно е најмладиот македонски фудбалер кој добил професионален договор со овој српски клуб. Нашиот фудбалер е на подготовките, чека официјално деби за првиот тим, но и покрај тоа што нема играно за сениорите, веќе собира пофалби.
„Тој е исклучително непредвидлив талентиран Македонец. Има дриблинг, има преглед на играта, има способност да го диктира темпото на игра. Сè што се бара од модерна десетка - го има. Го препознаа тоа на „Маракана“, па неодамна беше прогласен за најдобар играч на својата генерација.“, пишува „Меридиан Спорт“ за Трпевски.
Првите фудбалски чекори Лука Трпевски ги направи во Вардар, а во Црвена Звезда дојде од школата на Македонија Ѓорче Петров. Трпевски играше за младинската У15 репрезентација на Шведска, но доби повик од Македонија и го прифати, па е дел од У17-тимот.
