• Мартин Танасковски
Фудбалскиот клуб Тотенхем официјално го потврди именувањето на Томас Франк за нов главен тренер на првиот тим. Данскиот стратег потпиша долгорочен договор до 2028 година, со што клубот започнува нова ера со амбициозен и веќе докажан тренер на чело.
Во своето официјално соопштение, Тотенхем изрази задоволство од постигнатиот договор и верба дека Франк ќе донесе стабилност, идентитет и развој во играта на тимот. По успешниот период на клупата на Брентфорд, каде што Франк го однесе тимот од Чемпионшип до стабилен премиерлигаш, тој сега добива можност да се докаже и на повисоко ниво, во клуб со европски амбиции и богата историја.
Фановите на „петлите“ сега со нетрпение очекуваат да ја видат новата визија и стратегија на Томас Франк, кој важи за тренер со модерен пристап, силен тактички систем и голема верба во развој на млади фудбалери.
Томас Франк е роден на 9 октомври 1973 година во Данска. Својата тренерска кариера ја започнува во младинските категории на данската фудбалска федерација, каде што предводи неколку младински селекции (U16, U17 и U19) и е заслужен за развојот на голем број денешни дански репрезентативци.
Во 2013 година ја презема клупата на Брондби, еден од најтрофејните клубови во Данска, каде што поминува две сезони. По кратка пауза, во 2016 се приклучува на Брентфорд како помошник тренер, а во 2018 година станува главен тренер на тимот. Под негово водство, Брентфорд во 2021 година избори историска промоција во Премиер лигата – прв пласман во елитата по 74 години.
ФОТО: Tottenham Hotspur / Facebook
