• Горан Упале
Фудбалерите на Кајзерслаутерн се првите финалисти на овосезонското издание на Купот на Германија. Тие во полуфиналето го совладаа третолигашот Сарбрикен со 0-2 на гости, а стрелци на головите беа Ритер и Туре. По завршувањето на натпреварот фудбалерите на некогашниот бундеслигаш лудо ја прославија победата и пласманот во финалето.
Екипата на Кајзерслаутерн, која сезонава се бори за опстанок во втората германска лига, натпреварот за трофејот ќе го одигра на 25 мај, а противник ќе ѝ биде подобриот ривал од второто полуфинале меѓу лидерот во Бундеслигата, Баер Леверкузен и второлигашот Фортуна од Дизелдорф.
Кајзерслаутерн досега двапати го освојуваше Купот на Германија, првиот пат во 1990 година, а вториот во 1996 година, додека последен пат во финалето играше во 2003 година, кога загуби од Баерн.
Сарбрикен, кој во претходната фаза од натпреварувањето ги исфрли Баерн, Ајнтрахт Франкфурт и Борусија Менхенгладбах, немаше сили за уште едно изненадување и историски пласман во финалето.
