Судиска анализа: Пилешков не досуди два пенали за Работнички

Изминатиот викенд се одиграа натпреварите од второто коло во Првата македонска фудбалска лига. На програмата беа пет меча, за разлика од пред една недела, кога оправдано беа одложени два дуели. 

Судиската комисија на Фудбалската федерација на Македонија ги разгледа спорните одлуки од претходните два дена и ги донесе следните заклучоци:

„На натпреварот Шкупи - Македонија ЃП одигран на 13.08.2022 година, анализирани се ситуациите од 61. и 70. минута.

Главен судија: Александар Ставрев. Помошни судии: Дејан Костадинов и Гоце Петрески.

61. минута: ДОБРА ПРОЦЕНКА НА ГЛАВНИОТ СУДИЈА (НЕ досуден удар од 11 метри)

Во казнениот простор на Македонија, играч од нападот на Шкупи беше во посед на топка странично од голот и сакаше да ја додаде топката до свој соиграч, меѓутоа противнички играч од одбраната ја изби топката во телото на свој соиграч кој беше во лизгачки старт и со високо подигната рака. Многу добра поставеност на судијата во оваа ситуација, кој имаше комплетна прегледност.

Исправна одлука на главниот судија играта да продолжи, немаше елементи за да се досуди удар од 11 метри.

70. минута: ДОБРА ПРОЦЕНКА НА ПРВИОТ ПОМОШЕН СУДИЈА ( НЕ досудена офсајд позиција)

Центрирана топка странично од голот на Македонија, еден играч од нападот на Шкупи се наоѓаше во недозволена офсајд позиција, меѓутоа топката дојде до друг играч од нападот на македонскиот првак кој беше во дозволена позиција (влезе од втор план) и постигна гол.

Исправна одлука на асистентот судија што не досуди офсајд позиција и дозволи играта да продолжи, бидејки играчот што се наоѓаше во офсајд позиција не влијаеше на играта. Голот е регуларен.  

На натпреварот Брегалница - Струга Трим Лум одигран на 14.08.2022 година, анализирана е ситуацијата 55. минута.

Главен судија: Игор Стојчевски. Помошни судии: Даниел Василевски и Бранко Путилин.

55 минута: ДОБРА ПРОЦЕНКА НА ГЛАВНИОТ СУДИЈА (НЕ досуден удар од 11 метри)

Играч од нападот на Брегалница беше во посед на топката странично во шеснаесетникот на противникот и ја центрираше топката. При центрирањето топката го удри играчот од одбраната на Струга во рака која му беше во природна положба (спуштена и доближена  до телото), исто така имаше кратко рестојание помеѓу играчите за да може одбранбениот играч да реагира и да ја тргне раката.

Исправна одлука на главниот судија да дозволи играта да продолжи. Оваа ситуација е класичен пример за правилна одлука за удар во рака, каде што не треба да се досуди удар од 11 метри.

Судиската комисија на овој натпревар не е во целост задоволна од критериумите на досудување и не досудување на слободните удари на главниот судија.

На натпреварот Работнички - Академија Пандев одигран на 14.08.2022 година, анализирани се ситуациите од 38., 39. и 51. минута.

Главен судија: Димитар Пилешков. Помошни судии: Слаѓан Марковски и Кристијан Џонов.

38. минута: ПОГРЕШНА ПРОЦЕНКА НА ГЛАВНИОТ СУДИЈА (НЕ досуден удар од 11 метри)

Играч од нападот на Работнички беше во посед на топката во шеснасетникот на противникот, при центаршутот топката го удри играчот од одбраната на Академија Пандев во рака, која му беше високо подигната и во неприродна положба.

Погрешна одлука на главниот судија што дозволи играта да продолжи, иако беше многу добро поставен. Во оваа ситуација требаше да се досуди удар од 11 метри за екипата на Работнички.

39. минута: ПОГРЕШНА ПРОЦЕНКА НА ГЛАВНИОТ СУДИЈА (НЕ досуден удар од 11 метри)

Играч на Работнички упати топка во шеснаесетникот на Академија Пандев, на неа стартуваа играч од нападот на Работнички и играч од одбраната на Академија. Фудбалерот на Работнички прв стигна до топката, сакајки да ја избие топката играчот на Академија го удри во долниот дел од стапалото (закаснет старт) играчот на Работнички кој веке беше во посед на топката.

Погрешна одлука на главниот судија што дозволи играта да продолжи. Во оваа ситуација требаше да се досуди удар од 11 метри за екипата на Работнички за закаснет старт на нога со интензитет.

51. минута: ДОБРА ПРОЦЕНКА НА ВТОРИОТ АСИСТЕНТ СУДИЈА (НЕ досудена офсајд позиција)

Играч на Академија додаде топка до свој соиграч кој во моментот на додавање беше во линија со претпоследниот одбранбен играч на екипата на Работнички, ја прими топката и постигна гол.

Исправна одлука на вториот асистент што дозволи играта да продолжи, нема офсајд позиција и голот е регуларен.

На натпреварот Победа - Тиквеш одигран на 14.08.2022 година, анализирана е ситуацијата од 27. минута.

Главен судија: Александар Грујоски. Помошни судии: Куштрим Лика и Зоран Јанкуловски.

27 минута: ДОБРА ПРОЦЕНКА НА ГЛАВНИОТ СУДИЈА (НЕ досуден удар од 11 метри)

Играч на екипата на Победа беше во посед на топка во шеснаесетникот на Тиквеш, дојде до минимален контакт со одбранбениот играч од екипата на Тиквеш, тој контакт играчот на Победа го искористи за да изнуди удар од 11 метри.

Исправна одлука на главниот судија што дозволи играта да продолжи, многу добра поставеност и прегледност на судијата, стартот е без интензитет и недоволен за да се досуди удар од 11 метри.

На натпреварот Шкендија - Силекс немаше спорни ситуации за судиска анализа.“

Веќе в среда се игра заостанатиот натпревар од првото коло помеѓу Шкендија и Скопје. Комплетното трето коло се игра за време на викендот.