• Мартин Танасковски
Македонскиот интернационалец Андреј Стојчевски останува во словачкиот клуб Жилина на долг рок. Двете страни постигнаа нов договор кој ќе трае до 31 декември, 2026 година.
У21-играчот на Македонија е еден од најстандардните играчи оваа сезона во дресот на словачкиот тим каде одигра 15 од 17 натпревари. Постигна и еден гол во нив, па така си доби нов договор.
„Среќен сум затоа што потпишав нов договор. Имам големи амбиции, верувам дека мојот прогрес во Жилина ќе продолжи и понатаму. Ги чекам новите предизвици. Одушевен сум од актуелната сезона, се наоѓаме во добра форма и се надевам ќе продолжиме така“, изјави Стојчевски.
Играчот е дел од Жилина две години. Стојчевски во Словачка пристигна од Академија Пандев, а претходно играше за Вардар.
