• Мартин Танасковски
Ситуацијата околу Мохамед Салах во Ливерпул добива сè посериозна димензија, откако менаџерот Арне Слот донесе изненадувачка, но јасна одлука – египетската звезда да не биде дел од тимот за пресметката со Интер во Лигата на шампионите.
„Црвените“ патуваат на „Џузепе Меаца“ без својот најпознат фудбалер, а тоа неминовно го отвори прашањето: дали е ова почеток на крајот на Салах во Ливерпул? Слот потврди дека комуникацијата пред мечот против Интер била минимална и строго службена.
„Му соопштивме дека нема да патува со нас. Тоа е единствената комуникација од наша страна кон него,“ изјави холандскиот стратег.
Иако јавноста веќе со денови шпекулира за целосно нарушени односи, Слот тврди дека не почувствувал тензии сè до моментот кога Салах јавно ги критикуваше неговите одлуки.
„Воопшто не почувствував лош однос меѓу нас. Искрено, бев изненаден кога ги слушнав неговите коментари. Тој секогаш беше професионален, тренираше напорно и беше многу почитлив кон соиграчите и персоналот,“ објасни тренерот.
Кога беше прашан дали Салах тврдел дека Слот има нешто лично против него, менаџерот одговори внимателно:
„Само Мо може да одговори кој го имал на ум. Не сакам да претпоставувам во ваков момент,“ нагласи тој.
Враќање во тимот? Слот не затвора можности, но ниту дава гаранции. И покрај затегнатата ситуација, Слот смета дека секој играч може да се врати доколку постои вистинска желба и професионален пристап.
„Цврсто верувам дека секогаш постои пат назад,“ вели холанѓанецот.
Но на најважното прашање – дали Салах веќе го одиграл последниот натпревар во дресот на Ливерпул – одговорот остана повеќе од недоречен.
„Немам идеја. Во овој момент навистина не можам да одговорам,“ призна Слот.
Со јавни критики, јасна реакција од клубот и исклучување од најважниот натпревар во периодов, иднината на Салах на „Енфилд“ изгледа повеќе од неизвесна. Дали конфликтот е привремена криза или трајна одлука – засега никој во Ливерпул не дава конкретен одговор. Она што е јасно е дека Ливерпул и Салах се на раскрсница, а следните денови може да бидат одлучувачки за една од најуспешните икони во модерната историја на клубот.
