• Иван Димовски
Фудбалскиот клуб Шкендија не ги прими медалите во Купот на Македонија по поразот од Силекс (1-0). По крајот на финалето играчите беа под трибината со своите навивачи кои ги побараа нивните дресови, а потоа не се „јавија“ на повиците да дојдат да ги примат сребрените медали.
Поради тоа, клубот реши јавно да се огласи за ситуацијата. Тие демантираа дека Шкендија одбила да ги прими медалите и наведоа дека се работело за техничка грешка, односно играчите не ги слушнале повиците од официјалниот спикер, но сакале и да земат нова опрема од соблекувалната пред да дојдат на подиумот.
„Шкендија ја прифаќа одговорноста за разочарувањето што им беше приредена на нашите навивачи со поразот во финалето на Купот на Македонија. Овој неуспех бара анализа, а јасно е дека имаме грешки во нашите редови и главен предизвик сега останува да излеземе од оваа ситуација и да ги подобриме очигледните недостатоци што ги покажавме.
Во исто време, преку ова соопштение сакаме да ја разјасниме јавноста во врска со ситуацијата што се создаде по финалето и церемонијата на доделување медали. По натпреварот, нашите фудбалери отидоа кај навивачите за да им се заблагодарат за поддршката во текот на 90 минути и воедно да се извинат за разочарувањето предизвикано од денешниот пораз. Секако, по епилогот на финалето, навивачите беа оправдано разочарани, па престојот во близина на трибините траеше подолго од очекуваното. Фудбалерите останаа неколку минути покрај трибините, комуницирајќи со навивачите и не сакајќи несоодветно да го напуштат тој дел од стадионот.
Поради емоциите, бучавата на стадионот и ситуацијата што се создаде во тие моменти, фудбалерите не го слушнале повикот за церемонијата на доделување медали. Клубот побара дополнително време од организаторите за тимот да се смири и да се врати на теренот за официјалната церемонија.
Фудбалерите потоа се вратија на теренот, додека во тој момент церемонијата за играчите на Силекс веќе беше во тек. Дел од нашите играчи се упатија кон соблекувалната за да облечат дресови или спортска опрема, бидејќи некои од нив останаа без дресови, откако веднаш по натпреварот им ги подарија на навивачите.
Јасно нагласуваме дека во ниту еден момент Шкендија не одби да ги прими медалите, ниту пак имаше намера да покаже непочитување кон организаторот или противничкиот тим. Доказ за тоа е фактот што претставници на нашиот тим, меѓу кои Бесарт Ибраими, Арбин Зејнулаи и Мевлан Мурати, комуницираа со организаторите и воедно им честитаа на фудбалерите на Силекс за триумфот во финалето.
Целата ситуација беше резултат на недоразбирање и технички пропуст во емотивните моменти по натпреварот, а не намерна одлука или постапка од страна на клубот или нашите фудбалери“, стои во соопштението.
Поради ситуацијата од Фудбалската федерација на Македонија најавија постапка и потенцијални казни за Шкендија поради однесувањето.
