• Мартин Танасковски
Пред дуелот со Шкупи, стручниот штаб на Шкендија конечно доби едни позитивни вести за играчите кои настапуваат на голманската позиција. Првиот чувар на мрежата, Астрит Амзаи, целосно се опорави од повредата на грбот која го оддалечи од терените во изминатите две недели и повторно тренира со полн интензитет.
По успешно завршената рехабилитација и неколку индивидуални тренинзи, тој се приклучи на главниот состав и се очекува да биде подготвен за настап во саботниот натпревар против Шкупи. Овој податок е значаен за стручниот штаб, кој во претходните натпревари се соочи со сериозни проблеми во делот на голманската позиција. Во негово отсуство, одговорноста за одбраната на голот ја презеде Ферат Рамани, кој во натпреварот со Македонија ЃП ја имаше честа да биде меѓу стативите на првакот.
Од друга страна, вестите за Бабукар Гаје не се охрабрувачки. Репрезентативецот на Гамбија и понатаму се опоравува од повреда на задната ложа, која ја заработи во мечот со Јагиелонија во рамките на Конференциската лига. Медицинскиот тим на клубот го следи неговото закрепнување, но прогнозите велат дека ќе биде потребно уште време пред да се врати на теренот.
Моментално, Гаје спроведува индивидуална терапија и програма за рехабилитација со цел целосно заздравување и постепено враќање во натпреварувачка форма. Тренерот Беќири нагласи дека нема да се ризикува со негово предвремено враќање, со оглед дека сезоната е долга и секој играч мора да биде стопроцентно подготвен кога ќе добие шанса.
